Ishimwe na Kazaneza
- Girumugisha na Irakoze
- 2 days ago
- 2 min read
Updated: 13 hours ago
Mwari muzi ko igenekerezo rya 21 z’ukwezi kwa Ruhuhuma ryagenewe indimi kavukire? Uku kwezi nyene, Amezi atandatu araheze, umuhinyanyuzi w’ibisomwa vyacu kuri runo rubuga asezeranye imbere y’Imana n’imbere y’amategeko, Imbere y’umuryango n’imbere y’abagenzi, ko azobana akaramata n’umukunzi wiwe.
Kubw’ayo matariki abiri aranga ukwezi kwa Ruhuhuma, twahisemwo kubasangiza Ijambo ryashikirijwe ku musi w’ubugeni bwabo. Twaramuherekeje, turamushigikira, tuhava tunamutase nk’uwacu.
Tugire amahoro,
Tugire amahoro n’urukundo mu bantu.
Jewe nitwa Irakoze. Uyu turi kumwe nawe yitwa Girumugisha. Turi abagenzi bakunda Kazaneza kandi ubu na Ishimwe twizeye ko uzodushira mu bagenzi bawe.
Ijambo tuza gushikiriza riri mu mice igera kuri ibiri. Nk’uko mwavyumvise nitwa Irakoze. Ndi umutambukanyi wa Irakoze. Ijambo rya mbere niry’umuryango wacu. Umushingantahe wanje yantumye kubakeza gose hamwe n’imiryango yanyu. Yongera agira ati : Nimwakenera ababatera intera, nimwakenera abatega ugutwi, nimwakenera ababaterera igisabisho, turahari. Tuzobakirana urweze.
Ijambo rya kabiri ni Iryo kubakeza nk’abagenzi bacu. N’ubu umunwa ni jewe ariko ururimi ni jewe na Girumugisha. Hari n’umugwi w’abagenzi ba Kazaneza baje bava ku mugwa mukuru w’igihugu na bo barabakeza.
Uyu musi biragoye kuronka amajambo yovuga umunezero dufise. Girumugisha arashima Imana yo Iduha abantu izi dukeneye mu gihe gikwiriye. Mu myaka irenga cumi mumaze muzinanye, ngo wamubereye umugenzi w’ingirakamaro n’ubu kandi ukiriko. Akunze kubwira abo baganira ko uri umwe mubatumye yipfuza kumenya Imana kurusha. Ni vyinshi cane akwigirako, bimwe murivyo n’urukundo, kwamizako no kwama urondera kwisununura muvyo ukora vyose.
Kazaneza, jewe, tumaze imyaka igera kuri indwi tuzinanye kandi yambereye umugenzi yongera ambera umuvukanyi mwiza. Iyo myaka yose mwumvise tumaze turi incuti, nta misi iheze tubonanye amaso ku yandi. Nahora nkunda kumubwira ko naho biri uko “j’ai toujours eu l’impression qu’on s’était déjà rencontré plusieurs fois dans cette vie”.
Kazaneza ni umugenzi mwiza aguha umwanya, akwumviriza ariko kandi adatinya kukubwiza ukuri iyo uri mw’ikosa. Ivyo vyose akabikorana urukundo n’ubwenge bwinshi.
Hari umwaka ndiko ndamwifuriza isabukuru nziza namubwiye nti nizere ko abavyeyi bawe bakwishimiye. Rero bavyeyi mwavyaye mugaheka, ko ndose akaryo reka ndabibabwire - mwarakoze kumurera nk’imfura y’akarorero - murakaramba. Bavyeyi mumushigikira mu buryo bw’impwemu, mwarakoze namwe kubiba imbuto nyinshi nziza mu riwe. Twebwe abagenzi biwe nitwe twimbura ibikorwa vyiza vyanyu.
Nawe Mushingantahe Ishimwe, twarakwumviseko ivyiza vyinshi - turabaryohererewe. Nta mpungege dufise kubera tuzi kandi twizeye umushinge w’urugo rwanyu ari we Yesu Kristo.
Nk’uko ijambo ry’Imana rivuga n’umwungere w’ishengero yavyigishije, urugo rwose rurimwo umugabo n’umugore rutangaza inkuru nziza y’urukundo Kristo yakunze ishengero, akaryigura naryo rikamwubaha. Imana ishimwe yabajeje ibango rikomeye nk’iryo.
Tubifurije kugira urugo rwiza. Tubifurije urugo rugenderwa. Murakagira ivyona n’ivyonona. Murakagira urugo ruharanira gutangaza ubutumwa bwiza bwa Kristo n’ukugaruka kwiwe. Turabakunda!
N’ijwi ryuzuye urukundo,
Girumugisha na Irakoze
*credit: Gretchen Ram's - You, Me and Jesus
Comments