Indagano

*Kubipfuza gutega amatwi k'ino cese, murashobora gufyonda hano.

Mwari muzi ko igenekerezo rya 21 z’ukwezi kwa Ruhuhuma ryagenewe indimi kavukire? Uku kwezi nyene, kw’igenekerezo rya 14, hari abahimbaza umusi witiriwe uw’abakundana, bakabikora mu buryo butandukanye.

Kubw’ayo matariki abiri aranga ukwezi kwa Ruhuhuma, uyu musi nahisemwo kubasangiza indagano nafashije kwandika incuti yanje mu rurimi rw’iKirundi. Akibinsaba, uwo mugenzi yari yipfuza ko ku musi w’ubugeni bwiwe nokwandika nkongera nkavuga icese kivuga urukundo rwiwe n’umukunzi wiwe.

Ico cese cari ico kuryosha urubanza, na cane cane ko umushingantahe wiwe atari umurundi. Naramugamburukiye ndacandika. Yamara uko imisi yagenda, ni ko nabona ko bitazonkundira kwishikira ahazobera ivyo birori. Vyarangiye ca cese canditswe nk’indagano umugeni yasezeranye mu rusengero.

Nta gihe kirekire cari kihaciye ntanguye gushira ahabona ibisomwa vyanje. N’aho vyari uko, yaranyijeje igikorwa c’iteka nk’ico. Ndabimushimira. J & P rugume rusosa!

Indagano za J:

Rukundo rwanje,

Rukundo rwankundiye,

Rukundo rwo mubuto bwanje,

Wewe wankunze utiziganya

Unkunda ntaragukunda

Ubimbwira ntaravyumva

Ubimbwira nkibaza umutima.

Rukundo,

Aho uvugiye ikiri ku mutima,

Ukakimbwira utadidinganya, erega uwanje warasimvye

Usimba ata gituma, usimba usenga Rugira

Rugira yarishuye.

Uno musi umutima uraremye

Ugukunda nk’uwari ukuzi

Ugukunda nk’uwakugenewe

Ubu ndagukunda nk’uwanje,

Uwugushakira ineza muri vyose.

Uno musi

Ndizera ko nahuye

N’uwo Imana yari yarateguye

Ko tuzohura, tugahuza

Umugabo w’ijunja n’ijambo

Ashitsa ico avuze, ankunda akabinyereka.

None raba uno munsi

Duhagaze imbere y’abavyeyi,

Incuti, umuryango n’ishengero rya Kristo

Ngo tugaragaze icese ubumwe bwacu.

Ndakunda ingene unkunda

Ndakunda ishaka ryawe

N’igihe warondeye ukaruha, ntiwigera unyibagira.

Uno musi ndemeye icese, kwama nibuka na ntaryo

Ko ibibazo bitorerwa inyishu mu biyago no mu gisabisho,

Mu kwihangana no kwizigira ubugwaneza bwa mugenzawe.

Ndakwemereye ko ikibazo cawe kizoba ari icanje

Ndakwemereye ko tuzosangira vyose kandi nzokwubahisha ivyanje

Ndakwemereye kuzogusengera kenshi no kukuba hafi imisi yo kubaho kwanje.

Ndagukunda.

N’ijwi ryuzuye urukundo,

Irakoze

---

*credit: Inanga ya Donasiyano